Ils plans d'instrucziun dals roms "art figurativ" ed "art textil e tecnic" han la medema structura fundamentala. Els èn sutdividids en ils champs da cumpetenza percepziun e communicaziun, process e products sco era contexts ed orientaziun. Las particularitads specificas dal rom sa mussan en la structura interna (guardar tabellas 3 e 4).
Ils trais champs da cumpetenza han grondas interdependenzas in cun l'auter. En projects d'instrucziun vegni lavurà en tut ils trais champs da cumpetenza, ma cun differentas intensitads e successiuns. Il champ da cumpetenza process e products dovra per regla dapli temp ch'ils auters dus champs.
En ils plans d'instrucziun per l'art figurativ e l'art textil e tecnic n'èn vegnids fixads nagins puncts d'orientaziun, perquai ch'il svilup da las cumpetenzas cuntegna mo paucs stgalims da cumpetenza che vegnan sviluppads durant l'entira perioda dal ciclus respectiv.
Las cumpetenzas per la chapientscha tecnica èn armonisadas cun las cumpetenzas correspundentas dals champs "natira, uman e societad" (NUS) resp. "natira e tecnica" (NT), ma i èn vegnids fixads differents accents: Entant ch'i sa tracta en il plan d'instrucziun art textil e tecnic dal far experientschas ed emprovas praticas cun connexs da las scienzas natiralas e tecnics, da s'occupar da quests connexs e dals giuditgar, vegnan elavuradas en ils champs "natira, uman e societad" e "natira e tecnica" las basas teoreticas latiers.
